برا فکری چرا کیبریتی فرسەت تا لە دەستایە
شەوی یەلدا لە پێشە ڕۆژی عومرت وەختە ئاوابێ
"مەحوی"
یەکێک لەو داب و نەریتانەی لەناو گەلانی ئێران و بەتایبەت گەلی فارس باوە و گرینگی زۆری پێدەدرێ، کۆتا شەوی وەرزی پاییزە کە درێژترین شەوی ساڵە و بە " یەڵدا " ناوزەد کراوە.
زۆربەی هەرە زۆری خەڵک بۆ ئەم شەوە خۆیان ساز دەکەن و پێشتر خەرج و پیتاکی باشی بۆ کۆدەکەنەوە تا لەو درێژترین شەوەدا بە دەوری یەکەوە دانیشن و بە قسەوباسی جۆراوجۆر و کایە و... ڕایبوێرن.
بەڵام مەخابن کەم کەس هەیە بیر لەوە بکاتەوە کە خەریکە ڕۆژە خۆش و ڕووناکەکانی تەمەن بەرەو کۆتایی دێن و ئەبێ بارگەوبنەی سەفەر لێهاڵێنین و بۆ شەوە تاریک و ئەنگوستە چاوەکانی ناو گۆڕ هەنگاو هەڵگرین کە درێژترین شەوەکانن، ئەگەر پێشتر کیبریت و شقارتەیەکمان لەگەڵ خۆمان نەبردبێ کۆتایی هاتن و ڕووناک بوونەوەی ئەستەمە.
گەر خۆمان ئامادە و تەیار نەکەین بۆ ئەو شەوە درێژە دەچینە ڕیزی ئەو کەسانەی کە قوڕئان ئاماژەیان پێدەکا کە دەڵێن: " ئەی ئاخ و داخ بۆ ئەو کەم کاریەی لە ژیاندا کردم و گاڵتەم دەکرد".
زۆربەی ئەوانەی ئەو هەموو گرینگییە بەو شەوە ئەدەن یان دەوڵەمەند و دەستڕۆیشتوی بێ خەم و خەیاڵن لە ئاست و ڕاستی ناسۆر و پەژارەی کۆمەڵگە یان ئەو چینە مامناوەندیەوە و کەم دەرامەتەن کە هەر خەریکی چاولێکەرین و نایانەوێ وەک خۆیان بژین بەڵکوو کار و پیشەیان بۆتە لاساییکردنەوە و شوێن ئەم و ئەو کەوتن. لەم نێوەدا کەم کەس هەیە بیر بکاتەوە کە بابە ئاخر ئەم هەموو خەرجە زیادییە بۆ و لە پێناوی چی؟! مەگەر ئەم شەوە چ جیاوازییەکی لەگەڵ شەوەکانی تردا هەیە؟!! ئەی نابێ لایەک لە نەخۆش و هەژارەکان بکرێتەوە، بەتایبەت لەم هەلومەرجەی ئێستادا کە هەڵاوسانی ئابووری لەو پەڕی خۆیدایە؟!!! باشە بۆ لە بیری پاشەکەوتێک بۆ داهاتووی نادیار نەبین و ئەوەندە بێ‌خەم و خەیاڵ بین لە تەخشان و پەخشانی ماڵ و سامانمان؟!!.
لەوەش گرینگتر ئەوەیە با لە بیری شەوی یەڵدای ناو گۆڕدا بین، هاکا مردین و ڕۆژەکان کۆتاییان هات و داری تەمەن کەوتە وەرزی گەڵاڕێزان و ڕووت و قووت ماینەوە و ئاسۆی ژیانمان پڕ بوو لە بۆسۆ ... .
کەوایە با ئەو هۆنراوە بەنرخەی مامۆستا و شاعیری گەورەی گەلەکەمان "مەحوی" مەحوی خواناسی و دڵسۆزی بکەینە ئاڵقەی گوێمان و بە زەرق و بەرقی ئێرە هەڵنەخەڵەتێین، بەڵکوو شەوانی تاریک و ڕێگەی باریکی پاشەڕۆژ ببنە ڕۆژی تریفەدار و پانوپۆڕ.
بانە ـ 30 سەرماوەزی 2718
بۆچوونه‌کان